政情：周松崗大壽唔慶祝
港鐵行政總裁周松崗本月九日生日，正式踏入六十歲耳順之年。早幾日喺一個酒會上遇到周總，見佢笑容滿面，唔通慶祝六十大壽玩得好開心？點知佢話無慶祝喎！原來周總從來唔興慶祝生日，由爸爸嗰代開始，到佢啲仔都無慶祝生日，佢話生日只係出世嘅日子，無乜特別，毋須慶祝。不過，周總話港鐵同事都好有心，每年都會買個蛋糕同唱生日歌賀佢牛一。
周總生日後一星期，尋日即傳出好消息，享譽國際嘅工程及科技學會向周總頒授榮譽資深會員殊榮，以表揚佢喺工程領域上嘅卓越成就。○九年度全球只有三人獲此殊榮，其餘兩人為皇家工程學院會員J.E. Midwinter及已故中共領導人鄧小平嘅女兒、中國科協常務副主席鄧楠。周總獲獎後謙稱，過去其事業有幸同眾多才華橫溢嘅工程師共事，並對獲此殊榮深感榮幸，愧不敢當喎！
其實周總多年來戰績彪炳，喺英國氧氣集團（BOC Group plc）工作二十年，九三年獲委任為集團氣體部門總裁；九七至○一年出任GKN plc總裁；其後任職布萊堡工業集團行政總裁；○三年底起出任地鐵行政總裁至今，可以話長做長有。