政情：嫻姐交棒畀棠哥？
工聯會會長鄭耀棠早兩日放風話唔排除披甲上陣，喺二○一二年爭奪「超級區會」議席，令本來盛傳好有機會出選嘅副會長陳婉嫻行情看淡。雖然係咁，嫻姐並無靜下來，尋日應邀出席樂施會活動，同場仲有鮮魚行學校校長梁紀昌，兩人仲即席玩咗一陣類似「大富翁」嘅桌上遊戲添。
呢個遊戲叫做「搵食風雲」，參加者開始時要抽籤扮演唔同角色，嫻姐一抽就抽到做跟車送貨工人，點知玩到中途竟然畀人裁員。嫻姐事後話，呢個遊戲好寫實，覺得現實生活中打工仔嘅生活真係好慘，仲話要捉住煲呔曾一齊玩，等佢體驗民間疾苦。至於梁校長就抽到做會計師，條路當然順好多，最終亦順利勝出。
嫻姐話，有機會一定要將呢副遊戲送畀鄭耀棠，等棠哥下次開行會時可以同煲呔曾玩吓。嫻姐交託棠哥將副遊戲帶入行會，除咗暗示行會班達官貴人「何不食肉糜」之外，唔通係暗示要交棒畀對方，等棠哥接力出選超級區議會議席乎？