政情：民協搞路向營搵出路
一向扎根深水埗嘅民協，明日會喺東莞搞個兩日一夜嘅路向營，預計出席嘅黨員有三十個。民協立法會議員馮檢基話，過去幾年個黨其實已經做咗多方面嘅改革，好似成立青年民協，吸收新血、安排青年民協成員進入黨嘅核心領導層，安排佢哋接班、最重要係重新檢討黨綱內容，遲啲將修訂交由會員大會表決。
阿基解釋，黨綱係八十年代初起草，時至今日好多地方都有需要修訂，以前佢哋黨綱比較傾向社會主義經濟，但新嘅修訂就會係混合經濟模式。民協今次路向營會回顧當前香港嘅政治環境，仲會評估一啲政治新勢力會對佢哋造成乜嘢威脅。至於早前傳得好熾熱嘅民協、民主黨合併問題，今次路向營唔會討論。阿基強調，目前最重要係做好自己，嚟緊區議會全力搏殺搶位。民協一直衝唔出深水埗，加上社民連興起，佢哋都係時候諗諗計重新上路，今次路向營可唔可以搵到新出路，真係到時先知。