政情：郭亮明退休讀人類學
高官退休有人忙搵工，有人忙遊埠，十一月退休、下周起放假嘅懲教署一哥郭亮明就忙返學，佢報讀咗中文大學嘅人類學碩士課程，上周仲請半日假去開學。佢話喺監獄工作卅七年，對住四面圍牆，想睇遠啲，監獄始終係次文化，想學習主文化，好似文物保育、人種研究同考古咁，仲笑自己係班中最成熟一個，要諗下將白髮染黑。
至於會否從政或再做嘢，佢都Say No，義工則除外。其實郭Sir嘅退休生活好充實，十二月仲會去新加坡參加馬拉松比賽，佢話凌晨五點起跑，天氣又熱又濕，好大挑戰，下周放假一有時間就會集訓。
三十多年來最大挑戰係九十年代管理越南船民中心，要鬥智鬥力，佢當時係押解組主管，若有暴亂衝突係前鋒要行先，試過有幾百個船民拎住武器要衝出嚟，放催淚彈後，船民包條濕毛巾出嚟再打過。之後搜營仲攞命，船民竟然偷偷由高處倒滾油滾水，郭Sir就試過畀人掟炭爐受傷，船民有時仲打心理戰用婦孺行先，令佢最難忘。