政情：自由黨執靚高層下台階
本報尋日披露飲食界立法會議員張宇人（Tommy）考慮辭任自由黨副主席，今月底自由黨領導層將開會討論。消息曝光後，自由黨作出回應，但主席劉健儀（Miriam）同Tommy冇夾口供，Miriam中午對傳媒話，因該黨考慮常委田北辰晉升副主席，所以檢討整個領導層架構啫。不過，Tommy喺差不多同時間接受電台訪問，卻承認正考慮卸任副主席，理由係覺得時間唔夠用。到底Miriam同Tommy發生乜嘢事？
同劉健儀口供矛盾
Tommy有意離開自由黨領導層，「冰封三日，非一日之寒」。據聞，Tommy同Miriam、田二少等一眾黨領導層意見早已時有相左，甚至激烈爭拗，喺最低工資問題上嘅分歧，就係其中一個觸發點，所以大家雖同擠在一個自由黨領導層牌匾下，但貌合神離。記得早前Tommy突然喺《城市論壇》爆出「廿蚊張」風波，令自由黨備受壓力，翌日下午Miriam隨即開記者會急澄清，同Tommy劃清界線，點知Miriam事前完全無知會Tommy，Tommy當日中午先至從傳媒口中得知有此安排，佢嘅心情點樣，大家應該諗得到。
首個最低工資水平建議即將出台，代表飲食界嘅Tommy，立場與刻意經營走直選路線嘅自由黨肯定分歧好大，所以此時突然傳出Tommy有意卸任副主席，黨中人不感愕然。故事另一主角田二少勢將進身副主席，亦眾人皆知，二少下一步就係做自由黨主席，變相接佢大佬棒，只係隔代咁啫。
Miriam尋日中午見傳媒，被問起Tommy卸任副主席一事，佢承認自由黨月底開會，討論畀番個名分田二少，事關二少代表自由黨出席外間活動，不知就裏嘅人成日嫌二少唔夠代表性。至於Tommy，Miriam話佢毋須辭職，仲話Tommy對最低工資嘅壓力都唔係今時今日至有㗎啦。
不過，就喺佢會見傳媒前一個鐘頭，Tommy卻接受電台訪問，直認考慮過辭任副主席，最重要黨內是否有更理想人選出任，目前未有決定。正、副主席唔夾口供，反映佢哋溝通真係出問題。
自由黨尋日下午仲拿拿臨出新聞稿話，佢哋正檢討黨內領導層架構，研究如何加強黨務，其中一個考慮方向，係檢討黨章規定只可有兩名副主席嘅安排，係咪切合黨務發展，但一切尚在探索階段，無任何定案。講到模棱兩可，無論套落Miriam定Tommy嘅說話，都可以成立，變相幫兩位正、副主席搵咗一座下台階。