政情：楊哲安天生外父相
恭喜恭喜！去年頭做咗爸爸嘅教育局政治助理楊哲安（Jeremy），佢嘅藝人太太張燊悅上星期六又為佢添多一女，加埋歲半嘅大女，果然一副外父相。有兩女之父嘅Jeremy尋日出席活動時難掩喜悅之情，但就大呻呢排做嘢有返工冇放工，希望快啲搞掂晒啲嘢，放假陪太太同屋企新成員喎。
細女重七磅幾
教育局局長孫明揚尋日開記者會講暫緩殺校措施，作為政助嘅Jeremy都傍住孫公現身。Jeremy早前陪太太生仔，無跟其他副局政助到上海考察，尋日見到，大家都關心佢太太生咗未。Jeremy就甜絲絲話，細女已經喺上星期六出世，有成七磅幾重，相當健康。講得興起仲主動畀BB女嘅相我哋睇，睇見BB女白淨又靚女，似足佢嘅明星媽咪喎。
不過Jeremy話仲未幫細女改名，又大呻呢排忙於搞暫緩殺校單嘢，唔夠時間陪太太同BB女，希望日內快啲搞掂啲手尾，請番一、兩日大假陪家人，佢果然係個廿四孝老公同老竇噃。