政情：阿松想囝囝讀男拔？
為人父母，個個都希望仔女開心成長、入到好學校，前財政司司長梁錦松都唔例外。尋日傳統直資名校拔萃男書院附屬小學舉行小一入學簡介會，首場九點半開始，梁錦松同老婆伏明霞未夠九點就殺入學校，霸定頭位，坐定定聽校長講解入學要求。睇嚟佢哋兩公婆係想幫囝囝皓嘉報名入學。
伏明霞○二年嫁畀梁錦松後，○三年生咗大女司渝，○四年尾小伏再剖腹為梁家生咗皓嘉，到○八年生埋細仔就收爐。計番條數，皓嘉今年都五歲幾，明年就要升讀小一，怪不得兩公婆咁緊張，一早去幫囝囝搵定好學校。尋日成班記者追問梁錦松係咪想囝囝入男拔，阿松只係「哈！哈！哈！」笑咗三聲就走人。
拔萃男書院校長張灼祥話，尋日見到梁錦松夫婦，佢問小伏囝囝游水係咪好叻，梁錦松就搶住答話係。之不過考得拔萃嘅學生，個個都有幾項專長傍身，游水叻都唔會特別有分加。至於阿松有無私底下叫校長關照吓，張灼祥就話，梁錦松唔係舊生，唔會有額外分數，學校同小朋友面試時，亦唔會理佢嘅父母係邊個，總之就公平公正喎。