政情：「湖北首富」接掌嘉應商會
香港嘉應商會前晚換屆，金利來太子爺曾智明（Ricky）卸任會長一職，交棒畀福布斯富豪兼香港絲寶集團董事長梁亮勝。梁生係廣東梅縣人，但叱咤湖北商界，有「湖北首富」之稱。Ricky話，由梁生做會長，係客家人之光喎。
曾智明留任第一副會長
當選新會長嘅梁亮勝，前晚同太太出席會董交接禮，前全國人大常委曾憲梓與太太都嚟恭賀佢。Ricky卸任後，本來「升呢」做永遠榮譽會長，但佢睇到商會仍有需要，連榮譽都唔要，寧願留任做第一副會長。佢拍心口話，只要商會有需要，唔理喺邊個位置都會全力支持。
講番新會長梁亮勝，來頭唔嘢小，第一桶金全靠做紫檀木生意賺番嚟，八九年起，梁將賺得嘅二百萬美元成立絲寶公司，經營洗浴用品，生意蒸蒸日上。從○二年到○四年，連續三年登上湖北富豪榜首，○九年喺福布斯中國富豪榜上，梁亮勝身家高達三十五點八億元，旗下絲寶集團業務已擴展至日用品、藥業及房地產。
梁生富甲一方，梁太都唔執輸，前晚戴上晶瑩剔透翡翠玉鈪及鑽石耳環亮相，盡顯貴氣！
