政情：徐慶平憶述嚴父教誨
正所謂「字如其人」，「字乃人之衣冠」，身為「中國近代繪畫之父」徐悲鴻大師之後嘅「中國人民大學徐悲鴻藝術研究院」院長徐慶平，尋日出席《2010徐悲鴻盃國際青少年兒童美術比賽（香港賽區）》時，原來都係先學字再學畫。
今次比賽由幼兒組到高中組，作品多達二萬幾份，當中有畫有字，題材廣泛。徐慶平話，畫畫係表達情感最原始最直接嘅方法，只要畀筆同顏色小朋友就會畫，作為家長嘅唔好要求咁多，只要隨小朋友自由發揮就可以，因為小朋友點樣表達一定有自己嘅道理，等小朋友有八、九歲再同佢哋講畫畫理論，太早灌輸只會令佢哋失興趣。
唔講唔知，原來當年徐悲鴻都係咁教仔。徐慶平話，佢四歲起跟爸爸學習寫字，雖然爸爸係大師級，但從來無畀壓力佢，只係要求好嚴格。當時徐悲鴻工作忙，兩仔爺無得日日見，但爸爸點忙都會親自揀選字帖畀佢練字，規定每日要寫兩頁，兼且每日用紅筆親自批改，寫得靚嘅字會喺側邊打圈，最靚嘅有三個圈，無打圈嘅就要第二日重寫。徐慶平教路話，書法講求線條同形狀美，小朋友學寫字就可以學識美學，所以佢希望將書法呢門高深藝術發揚光大。