中環出更：鐘錶展酒會名人晒靚錶
香港鐘錶展尋日登場，主辦單位尋晚喺會展舉辦交流酒會，數以百計中外業內翹楚現身。香港鐘錶業總會主席朱繼陶（Joseph）、總會永遠名譽會長孫秉樞同公子孫大為、香港錶廠商會會長蘇永強、香港工業總會副主席劉展灝同公子劉燊濤（Gary）等人齊撐場。現場嘉賓冠蓋雲集，但都唔及現場名錶爭奇鬥艷咁精彩。
朱繼陶掏腰包招待貴賓
Joseph話，今年佢哋特登喺場內展示六個瑞士頂級名牌手錶，以便帶挈參展商提升設計工藝。當中最貴嘅係價值九百幾萬元嘅伯爵錶，令展場增添唔少貴氣。
香港鐘錶業論出口數量已係全球No.1，論貨值就僅次於瑞士，尋晚瑞士鐘錶業聯會主席Jean-Daniel Pasche亦遠道前來，傍晚五點幾落機就立即趕赴酒會，以實際行動支持香港同業。但主辦單位冇特別招呼呢位貴賓，酒會結束後Joseph自掏腰包請Jean去米芝蓮食肆滿福樓食廣東菜，仲急call老婆朱鄧麗萍同埋太子珠寶主席鄧鉅明作陪，總算冇失禮於人。
現場靚錶令人睇到眼花繚亂，香港鐘錶業總會副主席張繼東戴咗隻滿布閃鑽嘅潮爆腕錶，既時尚又招積。隻錶係佢嘅自創品牌Alan & Anthony出品，價值約五萬元，佢專做中東生意，所以唔怕喺香港同人撞錶。轉頭卓妮見到飛騰錶業太子爺Gary，咁啱中東又係佢哋嘅主要市場。Gary笑稱，中東女人成日由頭包到落腳，唯一可以展示嘅係雙手，所以佢哋好鍾意搶眼嘅鑽石手錶。尋晚佢戴住自家品牌Jean d’Eve嘅飛返系列經典腕錶，當時間去到十二點時，時針同埋秒針會飛返去原點，夠晒玩嘢。
卓妮