政情:楊明標步行籌款有心有力

中大尋日舉辦「與高錕教授同行」步行籌款活動,雖然天氣潮濕兼大霧,但無損大家行山同樂嘅興致。東方錶行主席楊明標同太太拍拖同行,雖然標叔已經七十幾歲,但行兩條大斜路都面不改容,仲可以談笑風生,真係厲害!熱愛跑馬拉松嘅「電器大王」蒙民偉公子蒙德揚(David),行山更加係小事一樁啦!

蒙德揚上堂學長跑

標叔健步如飛,好多後生仔都被佢拋離。原來佢幾十年嚟一直做好多運動,游水、打網球、高爾夫球都難唔倒佢。標叔游冬泳已經三十幾年,未試過中斷!十幾年前佢仲參加過渡海游泳比賽添!

至於啱啱參加完渣打馬拉松比賽嘅David,以三小時五十八分挑戰全馬成功,今次行三點五公里對佢嚟講濕濕碎啫!David為咗跑全馬仲特登花錢上堂,學吓長跑嘅竅門,好認真㗎!

標叔爆料話,David游水好叻,原來佢哋係同一個泳會,David仲攞過家庭組冠軍添!不過David話,佢捉三個仔女去學游水後,佢自己就少游嘞,因為游唔過佢哋嘛!尋日三個仔女去參加游水比賽,佢寧願行山囉!