中環耳目：孫公座駕水土不服又跪低
教育局局長孫明揚外表溫文爾雅，就連部座駕都有禮過人，由○七年落地至今，已先後多次喺孫公面前「跪低」，早幾日又跪多次！卓妮尋日喺香港會所遇到孫公去食午飯，見佢換咗車，咁佢平時坐開嗰部AM4福士輝騰（Volkswagen Phaeton）環保房車去咗邊呢？孫公無奈話：「又壞咗！」
「唔啱香港潮濕天氣」
孫公做人向來夠厚道，甚少作出批評，但講到部AM4座駕經常壞車時，就不吐不快話：「呢款車壞得好頻密，一年壞幾次，已經數唔出幾多次喇，總之款車唔啱香港嘅潮濕天氣啦！」問到今次部車又有乜頭暈身㷫，孫公就話唔係好了解，但估計都係電子零件出問題。孫公認為日本車啱香港環境多啲，孫公自己都鍾情日本車，屋企部凌志房車已揸咗七年，性能一切如常喎！
政府車轉用德國輝騰房車已經三年多，孫公嗰部用咗半年就要維修，跟住又到司法機構政務長劉嫣華架AM37座駕行行吓冒煙，仲有幾單無曝光嘅事故，令機電署最終要全線檢查同型號車輛，認真濕滯！