政情：陳繁昌自比《歲月神偷》
陳繁昌貴為科技大學校長，原來細個時都捱過「一步難，一步佳」嘅日子，佢早前接受電台訪問時，憶述自己兒時生活如同電影《歲月神偷》，當時佢家住筲箕灣木屋區，每逢打風都要驚屋頂畀大風吹起，最深印象係當年溫黛襲港十號風球，身為家中長子嘅佢，就要負責用「威吔」綁住屋頂同門窗，入定啲罐頭豆豉鯪魚，仲要安排女士們去石屎大廈避風，男丁就要留守屋企，依家諗番都幾有趣。
呢位熱愛運動嘅活力校長笑言自己唔認老，仲曾經想過做運動員，但最後有自知之明，索性喺學術發展。佢仲透露當年首次報讀皇仁書院預科時「慘食檸檬」，後來有同學仔通水話課室仲有空位，叫佢再去叩門終於成功，佢勉勵年輕人要勇於嘗試，不怕失敗。
科大喺亞洲大學排名中，由第四位躍升至第二位，陳繁昌被問到，有冇想過同港大交換位置，陳校長好謙虛咁話：「唔可以比較，科大嘅科學同商科出色，港大就醫學出色，況且學校歷史同性質都唔相同。」