政情：姚君達恐人仔急升累港商
仁濟醫院尋日喺沙田馬場舉行「仁濟盃」盛事，一眾主席、總理齊撐場。名牌二手店米蘭站主席姚君達（Byron）啱啱進軍北京朝陽區，直接殺入內地賺人民幣，但撞啱近排美國總統奧巴馬催促人民幣快速升值，Byron直言萬萬不可，若果「人仔」好似外界咁講急升兩成，相信好多港商會執笠。
喺內地開製衣廠嘅仁濟總理黃志深同Byron一齊，佢一聽到人民幣升值嘅話題都話好敏感，佢力撐總理溫家寶所講，如果人民幣急升會有好多人失業。計佢話，若果每年升值百分之二至三，都仲係可以接受嘅。
有「翡翠王后」之稱嘅仁濟主席董吳玲玲尋日亦盛裝現身，佢着咗件珊瑚色乾濕褸，襯白長褲同白色高踭鞋，手挽Hermes名牌手袋，輕便中帶貴氣。佢話自己平時好少買馬，不過尋日知名商人何壽南有馬出，何太何杜瑞卿曾任仁濟主席，依家仲係仁濟嘅永遠顧問，所以董太買咗二、三百蚊位置Q支持佢。不過最終匹馬唔生性，四甲不入，但董太一樣係咁開心，笑稱當係做善事啦！