魔術季後賽首敗

再一次證明，休息多唔代表係好事，魔術在次圈淘汰鷹隊後，足足休息咗六日，較「綠衫軍」多出一倍，可惜抖太耐反而導致魔術手感變冷。魔術開賽後連番施射不入，尤其幾位三分好手劉易斯、比杜斯及尼爾遜，完全未能入局，其中劉易斯6次起手射三分波食蛋，而尼爾遜就7球三分2中，「三分雨」戰術大為失效。

此外，「魔獸」杜域侯活表現亦差，全場只得13分，另失誤次數多達7次，難怪魔術首三節一度落後超過20分。雖然魔術最後一節回勇，一度追貼至2分差距，但「綠衫軍」尾段保持優勢，有驚無險地以92比88取勝。

「惡人」令「魔獸」冇啖好食

塞軍教頭李華士賽後指出，球隊贏在防守出色：「今場屬於一場防守之戰，柏堅斯、拉舒華萊士及格連戴維斯輪流對付杜域侯活，成功將其威力減低，我確要讚一讚華萊士嘅防守，佢可以話係聯盟嘅頂級。」的而且確，「惡人」華萊士今場就撩到「魔獸」食咗一次技術犯規。

至於塞爾特人兩巨頭雷阿倫及皮雅斯繼續有好表現，分別攻入25及22分，成為贏波功臣，而第二回合將在明早舉行，魔術續擁主場之利。 本報綜合報道