政情：細女飛返英余若薇心驚
冰島火山灰令唔少返香港過復活節嘅英國留學生被迫滯留，學生同家長都心急如焚，驚趕唔切返英國考公開試，當中包括立法會議員余若薇（Audrey）同埋馬會大董周永健。
Audrey尋日自爆話，終於鬆咗口氣，因為喺英國讀緊中學嘅細女Jacky終於趕得切返英國參加會考（GCSE）。話說Jacky同二家姐Cheryl都係喺英國讀書，兩個人上個月尾返香港過復活節，點知搞到被困香港。
周永健囝囝滯港
眼見過幾日就要考試，Jacky急到唔知點算好，不過好彩航空公司終於有機飛返英國，畀Jacky呢班待考生優先搭，尋晚就可以上機，總算平安過關，而Cheryl就仲要排隊先有得飛。不過Audrey就擔心火山灰未散晒，依家飛可能唔夠安全。
周永健喺英國倫敦大學攻讀法律嘅囝囝Justin就無咁好彩，佢返香港放復活節假，但到尋晚都仲未撲到機位。不過周永健話Justin仲有三星期要考試，希望到時航運已經回復正常，如果唔係游水都要游返去喎！