政情：傻強獨愛私伙硬枕頭
想高枕無憂，揀個啱身枕頭好關鍵。財經事務及庫務局局長陳家強唔算硬頸，但講起揀枕頭，就指定要瞓硬枕頭。局長前日出席喺會展舉行嘅香港家庭用品展，大爆出差時最唔慣瞓新枕頭，恨不得將屋企個私伙枕帶埋上機。
「傻強」陳家強前日為展覽剪綵，順便巡吓場，見佢左逛右逛，一時睇吓杯杯碟碟，一時
吓床上用品，鬼咁好奇，行到去售賣智能枕頭嘅展櫃前，即時停低細心研究。原來陳局長對揀枕頭要求高，甚麼羽絨枕頭、水枕頭都唔啱胃口，獨愛硬身枕頭，依家用緊乜牌子就唔講嘞，總之啱晒頭形，可惜唔方便帶出街喎。
林健鋒撐港產家品
立法會議員林健鋒（Jeffrey）前日都有份巡視會場，講起心水家用產品，佢話香港出品最正，首推「德國寶」出品嘅光波爐，用佢整自家製叉燒，香噴噴。至於家中嘅杯碟，都係香港品牌「Topchoice」出品，會場內咁啱有呢個品牌嘅專櫃，Jeffrey趁機貢吓有乜新貨，事關佢幫襯咗呢個品牌超過十年喎。