政情：Prada褲滿泥濘Tim霍唔肉赤
立法會民政事務委員會下禮拜會將粵劇發展擺上枱傾，研究喺高山劇場建附屬大樓及向粵劇發展基金注資等問題。開會之前，該委員會五位立法會議員率先去踩場，尋日冒雨組團去油麻地戲院地盤、紅磚屋及高山劇場參觀，霍震霆（Timothy）最富貴，着住名牌Prada褲直踩工地，褲腳沾滿泥濘都唔介意。
除咗Tim霍外，林大輝、王國興、劉秀成及葉國謙都嚟湊熱鬧。可惜天公不作美，清晨行雷兼閃電，一夜大雨後，戲院地盤滿布泥濘，Tim霍好勤力，喺工地內左捐右捐，一吓唔覺意，褲腳近鞋踭位置沾上一撻撻泥濘。睇真啲，條褲原來係Prada出品，Tim霍着幾千蚊靚褲踩工地，卓妮都戥佢肉赤，難得霍公子唔介意，仲笑騎騎話：「呢啲係普通嘢啫。」
今次重遊油麻地戲院，令Tim霍勾起唔少兒時回憶。佢自爆小時候經常陪嫲嫲睇粵劇，可惜佢對大戲興趣麻麻，大老倌梁醒波喺台上演出，Tim霍就喺台下睇錶，希望時間快啲過。最吸引佢係戲院門外有小販擺檔賣鮑魚等美食，一啖一口，回味無窮。至於點解有鮑魚賣，Tim霍就無解釋。
參觀完戲院後，眾人移師高山劇場，順便開咗半粒鐘閉門會議，不過林大輝有會要開，所以走先。會後有議員話，大家關注戲院改建成戲曲活動中心後嘅配套設施，希望做到足，包括有足夠排練室同廁所。