中環耳目：許華傑愛韓式漢堡K.G. Burger
漢堡包飲食文化搶攻香港多年，美式、日式漢堡包店更是門庭若市，中華出入口商會秘書長許華傑（Michael）都係無漢堡包不歡，為食正包，走遍港九新界，連印度、瑞典漢堡包都唔放過，近期愛上韓式風味漢堡包「KRAZE BURGERS」，仲食到儲埋「印仔」添。
Michael與漢堡包結緣，始於留學美國讀書年代，當年因為零用錢有限，只好食漢堡包醫肚。外國漢堡包千變萬化，既加入香草醃料，又有火雞肉及靚牛扒，一食上癮，Michael閒來鑽研整包嘅秘技，返到香港仍然「包不離口」，四出訪尋「絕世好包」。
近期新寵係「KRAZE BURGERS」嘅K.G. Burger，餡料包括牛肉、煙肉、芝士、香菇及醃黃瓜等，配上韓式風味燒烤醬，超正！Michael喜歡試埋店內「王牌」德克薩斯辣椒芝士薯條，每條薯條均沾上免治碎牛及洋葱粒，香脆無比。
