中環出更：余錦基着家傳豹皮暖入心

嘆公益金青黃不接

基哥呢件皮草褸好有紀念價值，原來係基哥媽媽嘅豹紋大褸，後來因為畀蟲蛀咗三個大窿，於是佢媽咪將件褸改造成唐裝大褸轉贈基哥爸爸。依家豹係受保護動物，搵件都幾難，所以基哥着得好小心，一來件褸好重，二來佢好明白好多朋友都覺得着皮草好殘忍，所以佢都唔係咁常着。之不過件褸有成五十年歷史，可以話係家傳之寶，亦充分體現咗上一代人嘅智慧同慳儉嘅香港精神，所以基哥話會將件褸留番畀下一代作留念。

講開香港精神，基哥嗰日孖住李業廣同孫大倫食飯，就係傾公益金嘅事，基哥話公益金提倡香港人幫番香港人，不過近年有啲青黃不接，好少年輕人加入公益金幫手。基哥話做公益金除咗捐錢之外，捐時間同經驗都好緊要，希望多啲年輕人加入做義工，幫番香港人。