政情：唔玩選特首范太封嘴
前立法會主席兼全國人大常委范徐麗泰多次被傳為二○一二年特首嘅大熱人選，最近傳言再起，有啲仲講到似層層。好似傳話范太喺兩會期間見過國務院港澳辦負責人，仲話范太同官方代表講，只要國家支持佢同需要佢，范太就會參選下屆特首為香港人服務。前兩日又有報道引述政界人士指，若然煲呔曾中途下台，范太好樂意臨危受命上陣，仲唔介意喺任期內解決煲呔曾搞極都唔掂嘅廿三條立法同交代普選路線圖，等中央放心可以畀香港人有普選等，搞到范太不勝其煩，尋日要出嚟闢謠。
其實盛傳范太會選特首，由○七年傳到今時今日，幾乎未停過，亦不知澄清過幾多次。范太尋晚出席一個宴會時鄭重其事話，自己無意競選特首，呢個諗法由以前到依家一直都無變過。范太話，唔明點解同一個傳聞每隔幾個月就出現一次，指自己「冇做過啲乜嘢」令呢啲謠言不斷出現，所以佢都「好莫名其妙」。
自言年紀大 唔夠精力
范太再次強調，自己已經年紀大、唔夠精力，而特首呢個位太辛苦，全年無休，應該要留番畀後生啲嘅人去做，自己從來都無參選嘅念頭。對於有人話范太見過中央官員，范太更加斬釘截鐵話，無任何中央官員就選特首嘅問題接觸過佢，亦無任何當權人士向佢提過希望佢做特首，自己更加無表達過對特首一職有興趣，希望呢個傳聞可以停止。
有政界人士分析，放出咁嘅風，一係就好想范太出嚟選，取代煲呔曾；一係就好唔想范太出嚟選，逼佢出嚟表態，等到時選特首少個對手。范太唔肯揣測邊啲人放啲咁嘅風，但就好氣憤話，每隔一段時間就要重複同一個答案，實在太無意思，所以今次講完之後，決定封嘴唔再回應呢個問題，希望大家唔好再擺佢上枱！問佢會唔會好似疑似特首候選人梁振英（CY）咁，講明「Ｎ屆都唔選」，范太就笑笑口話，佢有自己嘅風格，唔需要學CY講嘢。范太今次將可以封嘅後路全部封晒，睇怕都唔會好似其他人咁輕易收番唔參選嘅言論嘅！