中環出更：康寶駒Canali老西襯絲巾型爆
前足總主席康寶駒退任之後，日子過得瀟灑快活。早前卓妮喺中環國金商場嘅正斗粥麵歎雲吞麵，撞到康Sir同一位女伴入嚟，好耐無喺公共場合出現嘅康Sir笑容滿面，身形弗爆。卓妮勁讚佢條絲巾襯到佢有入型入格，康Sir好謙虛咁解釋，依家唔使打呔，所以咪用條絲巾保暖囉，但就唔記得咩牌子喇。
不過，康Sir套貼身西裝都大有來頭，就係好受城中名人歡迎嘅意大利頂級男裝Canali，見佢配埋條絲巾、恤衫同V領冷衫，夠晒型格，多啲贅肉都着唔到！
眨吓眼康Sir已經退出足總兩年幾，卓妮問佢對足球嘅熱情有無減退？佢諗都唔使諗話：「唔會！」六月世界盃足球賽喺南非舉行期間，康Sir要去紀律小組幫手，為期一個月，今次係佢首次為世界盃做紀律小組成員。康Sir閒時都會健吓身、打網球，但就好少落場踢波。佢嘅囝囝康錦煒依家代表東方踢波，兩父子都有律師資格，又熱愛足球，難怪康Sir咁春風得意！
近排香港足總是非多，卓妮問佢會否重出江湖？佢笑笑口話：「唔話你知！」康Sir大賣關子，唔通要畀香港球迷一個驚喜？
卓妮