中環出更：醫管局廿歲牛一五代同堂
尋日醫管局喺會展慶祝廿歲生日，有一千五百名賓客參加，首任主席鍾士元（大Sir）同埋梁智鴻等五任主席齊現身，上演一幕五代同堂嘅場面。各大慈善醫療團體同埋杏林翹楚亦踴躍撐場，難怪忙到滿場飛嘅醫管局主席胡定旭猛話好開心，因為見番好多老朋友。佢仲拍心口話，電影《歲月神偷》入面愛心欠奉嘅醫院片段唔會再現，賓客都會心微笑。
黃錢其濂 稀客現身
尋日好多貴賓出席晚宴，包括衞生部副部長王國強同埋中聯辦主任彭清華等。仲有好多同醫療系統有關嘅人物，例如紅十字會總監胡應湘太太胡郭秀萍、曾任醫管局成員嘅陳祖澤、現任成員李大壯等，仲有博愛醫院主席黃帆風、仁濟醫院主席董吳玲玲、東華三院主席梁定宇等，場面好不熱鬧。
晚宴都有好多稀客現身，令人感覺好似穿梭緊時光隧道。好似九○年代分別為衞生福利司同埋副衞生福利司嘅黃錢其濂、李麗娟，佢哋兩人係舊拍檔，又有份見證醫管局嘅成長，梗有傾唔完嘅當年趣事，難怪一見面就雞啄唔斷。
醫管局五任主席共聚一堂，輩分最高嘅梗係大Sir啦！佢係醫管局嘅開荒牛，因年事已高，行動不便，但幾位後輩主席好似金刀梁、肥胡咁，恭恭敬敬陪伴在側，大Sir嘅江湖地位不言而喻。卓妮問佢當年籌備醫管局嘅苦樂，佢話太多嘞，點講得晒！咁佢又點睇幾位繼任者嘅成績呢？大Sir好精靈咁話：「長江後浪推前浪！」又話當年情況同今時今日唔同晒，總之就唔忍心批評。
喺咁多前輩面前，新任醫管局行政總裁梁栢賢即時顯得特別後生，難怪佢對卓妮自嘲：「我係新人！」
卓妮