中環出更：Tom Jones騷靈情歌迷暈名太
闊別香港三十年嘅性感騷靈歌王Tom Jones，本周三重臨香江開騷，粉絲期待已久，情緒high爆，逼爆會展演唱會，城中名太聞風而至，當中不乏唱家班名媛，包括當年曾攞起結他唱民歌嘅維特健靈董事長陳曦齡醫生，仲有中總會長蔡冠深太太蔡關穎琴。Tom Jones又送飛吻又扭股，台下名太放下拘束，企起身跳不停，盡興今宵。
王守業夫人買飛請客
Tom Jones歌迷多如繁星，卓妮都係座上客之一。甫入場就見到唔少名人擔定櫈仔等開騷，原來呢晚係大新銀行主席王守業夫人買飛請客，多pair夫婦捧場，包括莎莎國際主席郭少明夫婦、遠東發展副主席邱達昌夫婦、「零食天王」戴德豐夫婦，曾揚言考慮參加五區補選嘅肥媽Maria Cordero都喺度，不過佢已講明唔選嘞，話唔想變相支持「公投」，仲話可能兩年後換屆會參選喎。
陳曦齡與醫生老公拍拖而來，原來佢鍾意聽Tom Jones唱《Green Green Grass Of Home》及《Delilah》，陳醫生歌喉唔弱，清純歌聲曾迷倒萬千少男，但喺偶像面前，都要寫個「服」字喎。
蔡冠深太太為女封咪
中總會長蔡冠深都陪埋太太嚟追星，可惜睇騷前連踩七個活動，演唱會中途遭睡魔急call，自己返屋企先。蔡太愈聽愈投入，唔捨得走，原來佢都係唱家班，仲係唱難度極高嘅意大利歌劇。真人不露相嘅蔡太，大學時代起已先後拜師三位著名女高音門下，分別係丘曉秋、畢永琴及江樺，為唱好曲，仲學埋意大利文、德文同法文，可惜近年忙於工作，加上家有五個寶貝仔女，次女嚟緊仲要考會考添，惟有暫時「封咪」，等仔女大啲再重拾興趣。
名太們同Tom Jones盡興一夜，翌日出席喺香港會舉行嘅女童軍聚餐，依然心情激動。戴德豐太太戴胡美蓉話，Tom Jones嘅金曲百聽不厭，可惜近年香港樂壇青黃不接，除咗聽吓張學友外，好少聽其他歌嘞！
卓妮