中環出更：科大獲殊榮陳繁昌風騷
科大商學院享負盛名，繼早前佢哋辦嘅全球行政人員工商管理碩士課程（EMBA）勇奪全球之冠後，佢哋嘅工商管理碩士課程（MBA）早前亦獲得《金融時報》選為本年度全球第九位，認真威水！尋日科大搞咗個慶祝酒會，教育局局長孫明揚、財經事務及庫務局局長陳家強、校董會主席張建東、科大校長陳繁昌同唔少政商界名人都畀面撐場，出身科大嘅陳家強更係重返娘家。
MBA課程進身全球十大
科大再下一城，校長陳繁昌顯得相當開心，佢同卓妮講，早前科大嘅EMBA課程勇奪全球第一，佢哋已經開心到好似贏咗世界盃一樣；今次MBA課程進身全球十大就更加難得，事關全世界有成幾千間學府開辦MBA課程，科大能夠進身Top 10、全球排名第九，絕對唔容易。陳繁昌搞Gag話，雖然佢唔識睇風水，但佢同陳振聰一樣，都係叫Tony Chan，所以佢預見科大MBA課程好快會攀升為世界第一喎，諗唔到陳校長都好識搞Gag！
身為科大MBA課程顧問嘅廠商會會長黃友嘉同「福布斯」富豪方潤華之子方文雄，尋日都有到場賀一賀科大。方文雄同卓妮講，方家同科大好有淵源，事關十幾年前科大創校時，佢爸爸都有份幫科大改名。問到佢咁多年嚟有冇捐錢畀科大，佢就笑笑口咁話「一直有聯繫」，死都唔肯正面回應。
卓妮