政情：莊學山打造開心樂園
潮屬社團總會前主席莊學山一向信佛，經常同老友傾佛偈散播歡樂，五年前索性斥資數百萬元喺筲箕灣開設道場「慈明佛學園地」。莊學山話，園地係「方便法門」，不同宗教人士都嚟得，無分彼此，最重要係資源共享，帶多啲笑聲畀香港人。
莊學山慨嘆，經濟愈發達，人心反而愈迷失，八十後、九十後年輕人變得太自我，終日悶悶不樂，長此落去，香港想有希望都難。佢話查實開心好簡單，佛學智慧就係心靈雞湯，大人細路都啱聽，佛學園地不時邀請來自香港、台灣、馬來西亞嘅法師舉辦講座、禪修班同兒童讀經班，分享開心竅門。近日仲出版埋兒童佛學教材，喺學校宣揚正確人生觀。
所謂善有善報，莊學山當初購入會址時，正值地產市道低潮，四千呎地方只賣三百多萬元，筍到極。最奇係，睇樓一刻，佢腦海裏竟然浮現出一個整潔道場嘅影像，同依家眼前見到嘅裝修一模一樣，唔到你唔信。