政情：陳南祿成功靠廿個字
身兼馬會大董嘅太古（中國）主席陳南祿（Philip）尋日返到母校港大，與學生分享「賽馬論人生」。有學生問佢成功嘅秘訣，佢總結咗二十隻字，就係「老細英明，同事能幹，夥伴合作，顧客支持」。咦？仲欠四個字喎！Philip笑謂，咪就係「唔關我事」囉，即係話件事做得好都唔關自己事，做事唔自大，最少都贏咗人緣喇。
Philip同班學弟學妹講，後生時讀書從未試過攞Ａ，但係生活好開心。好似大學一年級暑假，佢為咗填補自己未出過埠嘅遺憾，特登攞個海員牌去行船，結果一去四個月，連開學都遲到，但就眼界大開。
佢又提到一九八九年被太古派駐北京，當時佢連深圳都未去過，又唔識普通話，但都膽粗粗接受挑戰。上京後佢日日讀《人民日報》社論操練普通話，搞到佢講嘢好有黨報嘅風格添！
佢自爆咁多趣事，無非係想話畀學生知，做人要肯接受挑戰。不過，佢笑謂肯試都未必贏，就好似買馬，好多時都要貢獻出去㗎！