中環出更（一）：城中名媛閃爆「三八」酒會

中聯辦尋日舉行咗一個遲來的三八婦女節酒會，話晒今年係百周年紀念，逾千位名媛淑女齊捧場，好似前全國政協副主席霍英東嘅太太馮堅妮、全國政協委員蔣麗芸及江胡葆琳等，仲有着到紅彤彤嘅商務及經濟發展局常秘蔡瑩璧，人人變身中國娃娃開Party。

名鑽、翡翠向來係女人恩物，呢晚點少得，當中以高靜芝最搶鏡，身穿橙色旗袍婀娜多姿，原來布料購自北京，再搵上海師傅造衫。配襯旗袍好考人，高主席揀嚟藍寶石耳環、心口針及戒指，價值幾多就唔講嘞，單睇戒指足有龍眼咁大，至少有八卡。高主席自爆買鑽石交咗唔少學費，試過買到次等貨，好肉赤；依家學精咗，一睇鑽石光芒就知龍與鳳。佢話，買鑽石咪貪心，最緊要係貴精不貴多！

蔡關穎琴（左）翹住陳曦齡醫生（右）來張合照，原來蔡太好鍾意Valentino嘅立體花花圖案手袋。

放大圖片

張永珍百萬投鑽戒

搞大慶油田嘅張永珍都唔輸蝕，身上散發翡翠光芒。佢話翡翠鑽戒出自Harry Winston，十幾年前喺拍賣會上以一百萬元投得，翡翠耳環就購自倫敦拍賣會。張永珍喺拍賣會出手向來唔手軟，○二年喺蘇富比拍賣會上，以四千多萬元投得雍正粉彩蝠桃壽紋橄欖瓶，一鳴驚人。

放大圖片	高靜芝以耀眼藍寶石戒指配襯上海旗袍，手上鑽戒閃爍生輝，原來粒藍寶石主石由佢親自搜羅。 （葉華英攝）	放大圖片

不過鬥靚有好多招數，中總會長蔡冠深太太蔡關穎琴就以華麗奪目嘅Valentino手袋突圍而出。蔡太超愛Valentino，尤其鍾情其經典嘅立體花花圖案，夠晒高貴，於是一口氣掃咗四個，任何場合都可靚靚。

卓妮