政情：田二少遊張家界無啖好食

田二少同太太梁錦儀、囝囝Lester喺張家界玩咗幾日，此行以觀賞風景為主，二少請咗個御用導遊同司機，載佢四圍觀光。旅遊車闊敞舒適，二少都話正，可惜司機就唔多掂嘞，佢全程狂煲電話粥囉，頻頻單手揸軚盤，最慘係聲浪太大，掃晒二少一家睇風景嘅雅興，就算二少投訴，佢都當耳邊風。

激氣事接踵而至，往張家界途中要坐三粒幾鐘車，田二少中途停車幫襯當地小店，價錢雖然平到笑，但食材就麻麻哋嘞。二少叫咗沙鍋鴨同梅菜扣肉，點知隻鴨皮包骨，無肉食，扣肉亦只得肥豬肉，再來多一碟雞，都係骨多肉少。二少怕辣，惟有叫碗例湯送白飯填肚算嘞。

好彩四月嘅張家界風光明媚，沿途仲巧遇唔少香港人，大家上山落山都有打招呼，有啲仲問二少攞簽名添。