政情：煲呔曾箍票好夢成空

立法會○八年換屆後，建制派山頭林立，民建聯、工聯會、五散人同專業會議各自為政，自由黨分裂出經濟動力，仲有「金勞詹」詹培忠同旅遊界謝偉俊嘅「詹Sir二人組」，喺咁嘅大背景下，港府一向自恃搞掂民記等幾個大黨就手到票來嘅箍票機制，受到嚴重衝擊。港府自己無能，於是假手他人，大力栽培4L，希望透過4L黏合建制派，曲線為港府箍票，本來4P上釣在望，點知最近又暗生變化。

據悉，4L與4P暗交多月嘅消息突然曝光後，引起4L不安，猜疑有人故意向傳媒放風，係為咗反過嚟鯨吞4L，於是，有理冇理，對外一致否認呢段地下情，仲語帶嘲諷，透過傳媒反問4P有乜嫁妝，又暗示雙方理念唔同，好難拉埋天窗云云。

陷冷戰局面 難開花結果

消息傳回4P耳中，覺得莫名其妙，仲有被侮辱感覺，覺得明明係4L先送秋波，依家被人講到自己送上門，於是4P中已有人表明，唔會再現身雙方每兩星期一次嘅聚會，令4L與4P即刻陷入冷戰局面，一段剛萌芽嘅互信關係毀於一旦，相信都幾難會開花結果囉。

4L同4P組結聯盟有阻滯，最失望嗰個梗係港府啦，因建制派維持散修修局面，港府箍票繼續難難難！其實，求人不如求己，港府不如自己爭氣啲，如果推出嘅政策得民心，唔好話箍票唔難，就算你唔箍，啲票都自動送上門啦。