政情：余漢坤無意取代林偉強
自從離島區議會主席林偉強涉嫌騙取區議會租金津貼醜聞後，外間一直盛傳鄉議局主席劉皇發有意力捧自己嘅女婿、信和集團董事總經理余漢坤取而代之，亦有人揣測民建聯想捧來自該黨嘅離島區議會副主席周轉香上位。傳聞疑幻疑真，發叔尋日現身破解疑團，揚言「邊個做得嘢就捧邊個」！
發叔懶理流言
發叔女婿、現任離島區委任議員余漢坤，○八年擔任區議員以來非常低調，但近期漸趨高調，早前鄉議局新春團拜，余漢坤就代表信和置業上台移交支票，捐咗一百萬畀鄉議局起新大樓，搶盡風頭。發叔尋日出席妙法寺活動時話，至今仲未搵到林偉強，但對於佢「力捧女婿」嘅江湖傳聞，佢就話只係外界揣測，捕風捉影啫，仲話「清者自清，濁者自濁」。
不過，余漢坤對區會主席呢個位似乎興趣不大，佢尋日出席公開場合時話，自己相信「一步一腳印」，唔會行一步就諗十步之後嘅嘢，而且佢涉足政界不過兩年，無意爭林偉強個主席位。佢又向林偉強投信任票，話即使真係有人事變動，都會推舉周轉香接手。睇嚟林偉強呢單醜聞，只係為離島區議會角力戰掀開序幕，呢場戲應該仲有排睇！