中環出更：葉劉六十大壽 舊部畀面捧場
立法會議員葉劉淑儀本周二（廿四日）正式踏入六十歲「耳順」之年，佢愛女葉榮欣（Cynthia）前晚喺ifc四樓間「The Box」包場，搞咗個盛大自助餐宴會幫阿媽賀壽，邀請六十位親朋戚友，包括以前喺政府嘅一班舊下屬，好似保安局局長李少光、被視為光哥接班人嘅副局長黎棟國、前入境處副處長周國泉及前助理處長蔡炳麟等，仲要攜眷出席，不過就唔見近期地下情曝光嘅廉政專員湯顯明（Timothy）。
Cynthia一早到場打點，仲預訂一個重達十磅嘅藍色生日大蛋糕，襯晒葉太喺「上海灘」訂造嘅中式旗袍。傍晚七時許，嘉賓陸續到場，好多人都一雙一對咁出席，卓妮見到多位新舊高官外，皮膚科醫生史泰祖、前廠商會會長尹德勝、葉太嘅姪仔葉天賜及太太何淑懿、姪女葉天慧等都有現身賀壽。當然仲有葉太幾位愛徒，好似特首辦特別助理陳岳鵬（Ronald）、灣仔區議員黃楚峰、喺南區區議會薄扶林區補選中與司馬文對戰嘅劉應東。
身份尷尬 唔請Tim湯
當晚節目豐富，請到Joe Junior獻唱經典英文金曲助興，光哥太太亦獻唱鄧麗君名曲《月亮代表我的心》送畀葉太，但點知聽到如癡如醉嘅竟然係光哥，搞到葉太話首歌應該送畀光哥至啱。
Cynthia同Ronald都有唱歌，葉太就收集枱頭掉下嘅玫瑰花瓣到台前撒向Ronald，佢笑笑口話要學某啲議員咁掟吓嘢喎！壽宴尾聲，史泰祖與Ronald拉埋葉太一齊跳舞，又聯同眾賓客玩拉龍，將氣氛推至高峰。
當晚葉太收到好多生日禮物，佢愛女Cynthia又送咗乜嘢呢？原來葉太好鍾意喺睡房煲古裝劇，但睡房部「大牛龜」電視用咗十幾年，所以Cynthia今年送咗部三十二吋嘅大電視畀媽咪。卓妮問葉太點解唔見「Tim湯」湯顯明出席，佢話Tim湯做廉政專員出席議員活動，身份會好尷尬，所以無邀請到Tim湯喎。唔知大家仲記唔記得Tim湯早前參加乜嘢場合，因而暴露咗自己同入境處助理處長陳詠梅（Helen）嘅地下情呢？
卓妮