政情：煲呔曾焗畀田少冧莊

煲呔曾同田少早有宿怨，已係政壇公開秘密。○七年初，煲呔曾部署連任，免生火頭，田少先至得以入主原本由黨友周梁淑怡執掌嘅旅發局，事隔三年，煲呔曾依家翹埋雙手等退休，無所畏懼，仲唔趁旅發局換屆乘機報復田少？於是一向同煲呔曾關係友好嘅Jeffrey，有意同田少拗手瓜嘅傳聞不脛而走，甚至連海洋公園扮嘢文呢個「不可能人選」都被吹得言之鑿鑿，煲呔曾想秋後算帳、逼走田少之心，可謂路人皆見。

不過，煲呔曾強政勵治嘅外殼早已剝落，跛腳鴨政府一事無成，連復仇都搵唔到藉口。旅發局喺田少治下，不再復見各種糊塗帳，香港旅業亦口碑不俗，有呢啲政績金鐘罩護體，煲呔曾落刀唔易。更重要嘅係，政改大戰前夕，港府委任Jeffrey等如明剃自由黨眼眉，不利中央團結對敵嘅大政策，加上扮嘢文講明寧做海洋公園主席都唔入旅發局，煲呔曾惟有放棄復仇，唔再阻撓田少連任。

阿Paul批做法有問題

唔知係咪政府心虛，毒唔死田少，惟有幫田少貼金，尋日喺新聞稿將田少捧上天，盛讚田少帶領旅發局持續發展，協助業界克服金融海嘯同人類豬流感挑戰，成就卓越。

田少避過煲呔曾追殺，又嚟一個「法律超人」謝偉俊（Paul）。阿Paul批評，旅發局長期由政黨中人執掌嘅做法有問題，明打政府，暗射田少。正喺北京出席人大、政協「兩會」嘅田少回應，相信政府再委任佢，主要考慮其能力，同政黨或者職業背景等因素無關，話有能力而業界又鍾意你咪得囉！佢仲反寸阿Paul，指阿Paul係執業律師，都唔去選法律界，反而競逐旅遊界議席啦！