政情：陳振彬捐助消防家屬
長沙灣麗昌工廠大廈日前發生四級火慘劇，消防處同僚為殉職消防隊目家屬發起籌款外，民間善心人士亦捐款義助。據聞慘劇發生後，作為廠家嘅青年事務委員會主席陳振彬（Bunny），對消防員死傷感到難過外，並主動聯絡消防處處長盧振雄查看有乜可以幫忙，最後決定捐出十萬元予殉職消防隊目家屬，表示心意。
Bunny近日可謂腹背受敵，復辦青年高峰會議畀人話閉門造車，甚至有周刊幫佢大起底。有與會者話，青年峰會完全無限制青年入場，Bunny喺早上會議開始前，仲親自到場外邀請一班示威青年進場一起參與討論，但佢哋拒絕接受邀請，最奇怪係場內竟然有另一班青年突然喺討論期間舉牌示威抗議，仲搞到掟鞋添，如果真係閉門造車，有人可以掟到鞋咩？
不過，Bunny話最可惜並非個人得失，而係因為一小撮青年嘅不滿而影響咗參加峰會嘅六百多名青年，令一班青年學生花了一個月時間籌備嘅努力付諸流水。Bunny計劃稍後喺青年事務委員會上提出成立多個聚焦小組，讓青年人充分發表意見。