中環出更：超鳳爆賭王打機過網球癮
呢排興足球，前日政府公布未來足球發展新策略，咁啱尋晚保良局舉行周年慈善餐舞會，順道宣布成立足球發展基金推廣足球運動，主席何志豪話保良局搞足球運動一早傾好，無諗過咁啱，佢希望可以幫多啲對足球有興趣嘅青年人。細佬搞大騷，身為姐姐嘅何明懿話自己唔識睇波，但細佬做善事佢一定支持。足球係男人嘅世界，但都有女士錦上添花，尋晚個ball就吸引好多女士出席，個個盛裝而至，珠寶皮草，令人目不暇給。
呢排乍暖還寒，唔少靚太都以皮草示人。着住件皮草薄褸嚟嘅賭王女兒何超鳳心情大好，上星期接賭王爸爸出院嘅佢，話呢兩日爸爸無打麻雀，改打網球game。賭王向來唔鍾意同女仔打波，即使虛擬嘅都一樣，不過睇住爸爸自得其樂，超鳳一樣開心。佢仲話賭王最掛住屋企嘅唔係張床，而係佢啲心肝。咩咁巴閉令賭王心掛掛呢？之唔係賭王養嗰幾條生猛大魚囉！賭王仲一返到屋企第一件事就要同佢哋say hi添！
蔡李惠莉再開幼稚園
蔡太李惠莉就無着皮草，但佢以綠色晚裝配襯綠寶石加鑽石嘅首飾就同樣高貴耀眼，蔡太話呢套首飾買咗好耐，但唔肯講卡數有幾多，話要考考卓妮眼光！不過一提到個乖孫蔡太就唔玩猜啞謎，仲大騷電話入面乖孫張近照畀卓妮睇。兩歲嘅孫仔依偎住喺婆婆懷中，唔好話蔡太，卓妮都心軟。
不過蔡太都無忘記其他小朋友，依家有兩間幼稚園嘅蔡太，稍後會喺粉嶺開多間，為區內提供多一個選擇。
卓妮喺晚宴上仲見到保良局副主席鄭錦鐘一家四口，鄭錦鐘個仔仔鄭詠舜被視為民建聯新星，亦係藝人胡杏兒嘅姐夫，身為爸爸嘅鄭錦鐘，更加全力支持仔仔從政。
卓妮