政情:黃帆風行善 拜陳振彬為師

香港五大慈善團體之一嘅博愛醫院今日開始展開一年一度嘅全港慈善籌款活動,上周四舉行籌款開幕禮,觀塘、九龍城同埋北區三個區議會主席亦親自撐場。博愛主席黃帆風見到觀塘區議會主席陳振彬(Bunny)特別開心,直呼佢做「師傅」,原來Bunny做過博愛主席,兩人相識十幾年,大家拍住做善事好啱Key!

黃帆風話,係Bunny帶佢入觀塘做社區服務,依家Bunny係健康快車主席,而黃主席就係副會長。由於黃主席嘅濱海集團喺觀塘,係Bunny地頭,所以佢零舍投入區內事務。咁有冇打算繼續追隨Bunny從政呢?黃主席耍手擰頭,笑謂唔會啦!

當晚九龍城區議會主席王國強(KK)都嚟捧場,佢話自己曾任保良局總理,同各大慈善團體關係好好,所以梗要嚟支持博愛嘅盛會。KK間金城營造生意好穩定,唔知佢有冇打算上市呢?佢笑謂:「上市有咩好?食餐飯都要同股東交代,依家咪幾好!」咁即係KK大把水,唔使上市集資啦!