政情：張灼祥否認出戰補選
繼藝人「肥媽」宣布考慮參加五月立法會補選後，尋日又有傳聞指名校拔萃男書院校長張灼祥都有意競逐九龍東議席，不過張灼祥矢口否認，仲話對傳聞莫名其妙，好似被擺上枱咁。張校長話，自己愛好自由，加上校長工作又忙，做立法會議員唔係佢杯茶喎！
張校長尋日同我哋闢謠，話從來無意思、亦無考慮參選，更加無人游說佢參選。佢相信傳聞源自言語誤會，事緣上星期佢同一位反對公投嘅立法會議員傾偈，雙方各自講吓對補選嘅睇法，但完全無提及參選一事；點知前日佢離奇收到傳媒電話，問佢係咪想參選。佢話：「我當時好愕然，唔知點反應，淨係諗究竟邊個傳出嚟？」覺得畀人擺上枱。
張校長重申今次補選似鬧劇：「你自己辭職唔做，但又自己出番來選，咁係咪搞笑呢？」好似佢一個朋友，都係中學校長，已向學校辭職，點知過一排又後悔，寫信去應徵同一職位，最終未能如願，張校長有感而發話：「我之前都有勸佢唔好，好似玩咁！」