何柱國唔認報復查懋聲

記：記者提問　　　　何：何柱國回應

記：點解今次會聲援蔡生？

何：覺得有啲同病相憐。

何：今朝早我打電話畀蔡生，我同蔡生話呢，叫佢唔好勞氣，唔好激氣，我話我以前亦都經過同樣嘅經歷，我就咁樣同佢講啫。嗱，我要各位知道，我講一樣嘢，我同查懋聲係朋友嚟㗎，我唔係攻擊佢㗎，因為我要好多謝佢，佢有呢個機會等我去買《星島》，咁我先可以做得出有啲成就出嚟，今日《星島》都起碼都算成功吖，所以我唔係攻擊佢嘅，不過我覺得蔡生嬲都有佢理由，咁我就解釋畀佢聽「你唔好嬲」，唔係佢哋以為我哋香港人呃台灣人吖嘛，咁我係香港人都有咁嘅經歷，所以唔需要嬲，而且係一件好事嚟嘅。點解呢？如果無查生，我都無得做一件有意義嘅事吖，因為起碼我哋《星島》員工個個都幾好，所以我係感謝佢㗎，衷心感謝。

記：何生，你話以前有類似經歷，係咩經歷？

何：好耐囉，十年囉，都十年㗎喇，但我唔係報仇呀，啲人話君子報仇十年不晚，我絕對唔係君子嚟㗎，我小人嚟㗎，我唔係君子，我唔係報仇。

「好在無合作 千祈唔好合作」

記：可唔可以同蔡生分享番點樣經歷投資或有咩問題？

何：查生呀，牽涉《星島》少少啦，佢一陣又話做，一陣間又話唔做咁嘅嘢，小事嚟㗎，我好感謝佢㗎。

記：問番清楚少少，因為蔡生話你同佢講話吃過虧，咁吃虧係咪同查生有關？係咪同《星島》買賣有關？

何：係，嗰時有少少關係啦，十年嘅嘢我都唔記得咯，有時谷氣過頭唔記得呢，唔會時時記得㗎喇，但係都係好事嚟，絕對係好事嚟，所以我好感謝查生。

記：吃虧純粹係……

何：吃虧就無吃虧，講唔講誠信啫，不過呢，睇番嚟查生嗰時後生，後生仔講唔講誠信信用都唔緊要，查生今年幾多歲？幾多歲呀？（62歲）六十幾呀，十年前都唔算後生㗎喇，都成熟嘅人，不過，佢時時好後生，因為heart，唔係要㗎。

記：可唔可以組織下你十年前嘅片段，係咪查生都曾經表示過同你合作《星島》嘅發展，但係話投資……

何：喂，唔好呀，嗱，如果我同佢合作呢，更慘㗎喇，咁變咗蔡生，淪落到今日蔡生嘅地步，好在無合作，唔係談合作嘅，千祈唔好合作。

記：最後佢係無參與到？

何：無無無，查生係一個好人嚟，你記住。

記：點解一個好人會咁無信用呢？

何：信用？後生仔唔緊要嘅，喂你十零歲，六、七歲嗰時，同朋友仔講下唔認數都得㗎，無乜所謂。

記：佢嗰時五十幾歲……

何：五十幾歲，佢心裏面時時認為自己後生嘛。

記：何生，你當年同佢傾生意，依家大家都係朋友？

何：梗係朋友嚟啦，我好支持佢㗎。

記：係咪話畀蔡生聽佢毋須介懷繼續去搞亞視？

何：我叫蔡生呢，嗱，蔡生係一個白手興家嘅人，一個白手興家嘅人一定有佢成功嘅地方，一定係一個有信用嘅人先可以做到咁大嘅生意，唔係容易㗎，一步步爬上嚟嘅，查生同我背景差唔多，都唔係創業㗎嘛，蔡生嘅水平呀成功呀，更係高我哋好多。

記：蔡生同查生係繼續合作，你覺得應該繼續定係點？

何：你問我如果兩個人，嗱，佢哋內容我又唔係好清楚啦，蔡生誠信可靠啲㗎，因為佢成功啲嘛。

記：如果有人話要同查生合作，你有無咩忠告畀佢，例如王征？

何：王征講嘢咁叻，佢都好識講，嗱，我個人就唔識講嘢，我無查懋聲講嘢咁叻，水平咁高，我就直腸直肚啲，佢講嘢好有深度㗎。

記：咁佢點樣搵你笨？

何：佢無搵過我笨。

「唔可以話跣我一鑊，我天真啫」

記：跣你一鑊喎？

何：唔可以話跣我一鑊，我天真啫，我天真我傻啲啫。

記：點樣袋錢落你袋？點益咗你？上咗人生寶貴一課？

何：喂，睇人識人嘅嘢，用吓大腦囉，唔好信嗰個人屋企有咩背景，乜乜嘢囉，用下大腦囉。

記：蔡生話查生欺人太甚，你覺得係咪有啲身同感受？

何：欺人太甚就唔會囉，點欺人太甚吖，慣咗㗎啦，人生路不熟係咁㗎啦，都唔係欺人呀，啱唔啱呀，蔡生就信佢多啲囉，蔡生就直腸直肚嘅。

記：以你所知除咗你兩個之外，有無其他人都有同樣嘅遭遇？即係有無人被佢坤過囉？

何：唔好講坤字，呢啲唔可以立亂講，坤人呢啲嘢唔可以咁講。

記：即係同遭遇嘅人都可以將一啲經驗可以分享多啲？

何：分享好難講喎，有啲人講咗我又唔方便講人哋嘅嘢，嗱，佢十幾年前被人開咗槍，呢個世界上面好少有㗎喎，為咗咁嘅嘢開槍打人嘅事件，佢被人打一槍嘅事好少有喎，有無人會憎恨到要開一槍呢？

記：開槍……係咪查懋聲？

何：我就唔清楚呢件事，點解有人會上佢寫字樓，你哋唔知呢件事㗎？你哋全部後生去睇下啦，上到寫字樓被人開一槍呀，嘭一槍，為咗啲判頭唔知咩事，返去查下網頁啦，做記者要睇下前因後果嘅。

記：你會唔會擔心佢都畀人嘭一槍呀？

何：唔好嘅，唔會嘅，咁好嘅人點會畀人嘭一槍呢？

記：佢點好啫？你成日話佢好人，又講唔出佢有幾好？

何：佢對我好喎，令我做咗一番事業出嚟，有咩唔好呀。點呀，我call你個個都嚟，即係證明我都成功。

記：你會點形容當時你同佢交手嗰一役呢？

何：無乜點樣交手，我聽咗之後無聲出之嘛。

記：但你係咪忍咗十年？

何：我無忍到喎。

記：即係等到依家有機會講？

何：咁嗰時我接收咗《星島》，咪化悲憤為力量，咪依家今日幾好，我真係多謝佢㗎，衷心多謝佢，我唔係攻擊佢㗎，你要記住，我係多謝佢呀。

記：之前有無同佢交過手，《星島》之前？

何：哎吔，十隻手指都喺度，好在。（數得晒呀？）數得晒，仲多咗啲添，無無無，謝天謝地。

記：何生，有無幾字真言忠告蔡生以後點走條路？

何：化悲憤為力量囉，我覺得愈做愈好㗎蔡生呢次。

據了解，九十年代，當時經營星島的胡仙曾向何柱國的祖父、人稱「何伯」的慈善家何英傑借錢，後來胡仙有意放售星島而查家表示有興趣，何伯作為最大債權人，遂派何柱國做代表與查家商討，但在正式簽約前數小時，查家突然打退堂鼓。據悉，何柱國更為此遭何伯教訓，在商場上勿輕易信人。