政情：陳南祿愛女背城借一
太古（中國）主席陳南祿（Philip）間中喺賽馬日都會同埋太太及一對仔女入場，佢嘅大仔Kelvin前年中喺美國讀完經濟畢業返港後，現時已經做緊一份穩定工作，做爸爸嘅Philip都放下心頭大石，反而放唔低讀緊中五嘅愛女Michelle，因為今年要面對香港歷史上最後一次會考。
新高中學制下學年推行，換言之今年係最後一次會考，成績唔好只可以重考一次，但就無機會重讀嘞，令一眾末代會考生同家長相當緊張。Philip坦言，女兒今次「背城借一」，會全力迎戰會考，佢就寄望愛女努力考好啲。
Philip口中嘅「背城借一」，係出自《左傳‧成公二年》，話說戰敗國齊國向晉國求和，可惜晉國開出苛刻條件，齊國惟有收拾最後兵力，背着城池作最後決戰。有個中文程度咁好嘅爸爸，Michelle最少考中文唔使驚喇。