勁呀！香港一定得，再次排第一！
你都咪話唔架勢，中國社會科學院公布二○一一年中國城市競爭力排名，香港力壓兩岸四地接近三百個城市，連續十年高踞首位。即係話，十連霸！
除咗香港之外，台北都好叻仔，由上次排名第六升至第二，北京就首次超越上海排名第三，上海退居第四，深圳排第五。第六至第十位依次係廣州、天津、杭州、青島以及長沙。
咦咦咦，咪住先，香港呢個一哥地位似乎唔係好穩陣，事關內地城市急起直追。社科院嘅報告係咁講嘅，香港同內地差距正在逐步縮小，其中稅收、人才同軟硬件等等競爭優勢漸漸弱化，特別係高租金成本，不利中小企發展，而欠缺對科技嘅足夠重視、人口老化以及缺乏靈活人才流動制度，令內地優秀人才無法自由進入，長遠削弱競爭力。
弊喇呢鋪，功夫茶諗起一個耳熟能詳嘅故事。一隻兔仔，一隻龜仔，跑步比賽，兔仔偷懶瞓覺，龜仔死追爛追，結果龜仔贏咗兔仔。呢個故事係人都聽過，人人都明白，問題係，當局者迷吖嘛，兔仔未必知道自己死蠢得咁交關㗎！
香港競爭力一向傲視國內同胞，呢家嘢都唔使賣花讚花香。可惜嘅係，內地同胞嘅發展勢頭一日千里，三年一小變，五年一大變，之但係香港嘅特區政府一直蹉跎歲月，回歸十五年以來原地踏步。
學似社科院話齋，削弱競爭力嘅原因包括高租金成本不利中小企發展，點解會有呢一個問題呀？咪就係本地官僚只係獨沽一味發展地產囉。地產獨大之下，莫講話中小企難以發展，小市民想買個有瓦遮頭嘅豆腐膶單位容身都難比登天。
特區政府話就話發展乜鬼嘢六大優勢產業，實際情況係點呢？望天打卦囉，仍然處於畫餅充飢嘅搵笨狀態。最搞笑嘅係六大之一嘅醫療產業，喂，雙非孕婦攻陷各大醫院喇，急症室醫護人員忙到有七成想劈炮，醫療產業喺邊度呀？
諗諗下有少少唔對路，曾蔭權好耐冇提過十大基建，會唔會又係「不提就不存在」㗎？最低限度，十大之一嘅西九文化區，講咗十幾年㗎喇，到咗今時今日仍然係一塊雀仔都唔會走去生蛋嘅爛地。
講到呢度，大家應該明白競爭力十連霸其實係食老本嘅結果，遲早坐食山崩，香港面對被邊緣化危機，已經日甚一日。所以話啫，曾蔭權最大嘅貢獻係依時依候夠鐘收工，從來冇話過謀朝篡位賴死唔走，容許民眾心存希望，唔該下屆政府唔好再做一隻偷懶瞓覺嘅死蠢兔仔！