好戲預告，密切留意，今年九月將會上演一齣劇力萬鈞嘅《選民復仇記》！
點解會有呢一齣好戲嘅呢？原因好簡單，建制派立法會議員實在太醜陋嘞，醜陋到大失民心。喺咁嘅情況之下，選民自然利用手上神聖嘅選票，懲罰呢一班漠視民意嘅政客。今年九月立法會選舉，建制派將會淪為選民嘅復仇目標，隨時議席不保呀，該煨！
建制派立法會議員嗰一種醜陋，真係令人髮指o架。你知啦，「痛心特首」曾蔭權貪得無厭，接受富豪奢華款待不特止，變身「離岸特首」外訪公幹又要浪費納稅人血汗錢入住總統套房，連飛行里數同簽帳積分都據為己有，稍有血性嘅人都睇唔過眼啦。偏偏以保皇為己任嘅擦鞋仔冇乜血性，一次又一次築起人肉長城，瞓身維護貪曾，變相捍衞貪腐。喂，廉潔奉公係香港嘅核心價值，建制派一嘢否決反貪曾動議，唔係站於善良民眾嘅對立面咩？你做初一，我做十五，九月立法會選舉唔復仇都唔係人啦！
「東方報業民意調查」結果顯示，對於建制派玩拉布阻撓立法會內會討論貪曾醜聞，又否決即時處理反貪曾動議，三成六受訪者直斥盲目包庇，助紂為虐；三成四認為事件凸顯議員醜陋一面；一成三覺得建制派為救貪曾失民心。
嗱嗱嗱，大家記住嘞，九月選舉日，選民復仇時，到時全港七百萬市民組成「復仇者聯盟」，雖然冇變形俠醫或者鐵甲奇俠，不過仍然可以伸張正義o架。
對於審計報告批評曾蔭權濫用公帑入住總統套房，建制派仍然護短，三成四受訪者認為是非不分，與民意為敵；三成指摘建制派係千古罪人，摧毀香港核心價值；兩成感到護曾變護貪。
所以話啫，眾怒難犯，危牆莫站。今次擦鞋仔肯定擦出禍，保住一個貪曾等於攬住一個炸彈，隨時將自己炸到灰飛煙滅。情況就好比當年嘅台灣之恥陳水扁，民進黨包庇呢一個闔家舞弊嘅貪腐總統吖嘛，義憤填膺嘅選民一手令佢哋慘敗得一塌糊塗。
調查顯示，三成八受訪者直言，九月立法會選舉唔會投票畀盲目保皇嘅議員；兩成六表示議員會負上政治責任；兩成二認為票債票償，選民唾棄。
呢一場選民復仇記，嚴格而言係「有腰骨義士決戰無脊椎動物」。醜陋政客擦鞋仔卑躬屈膝保護貪腐皇上吖嘛，大義凜然嘅選民就要挺直腰骨，大腳踢走呢一班毫無原則嘅無脊椎動物，藉此捍衞香港嘅廉潔傳統。
計功夫茶話齋，出得嚟貪，預咗要還。莫講話建制派必須負上政治責任，曾蔭權都要喺廉署調查之下負上刑事責任！