76人放棄艾佛遜 再別A.I.
艾佛遜結束短暫嘅復出生涯，「A.I.」因女兒患病而錯過近一個月嘅操練，費城76人經開會研究後決定同艾佛遜解約，今次已經係「A.I.」今季第二次被球隊放棄，睇嚟佢嘅球員生涯已經畫上句號。
今年三十四歲嘅艾佛遜係九六年ＮＢＡ狀元，佢畀76人揀中後，喺費城度過咗十一年光景，呢段時間亦係佢職業生涯嘅高峰，之後佢打過金塊同活塞。今季加盟灰熊後，由於上陣時間甚少，故最終同球隊不歡而散，並宣布退休。
為患病女兒捨事業
艾佛遜喺去年十二月重投76人，但只簽約一年，佢始終係76人最具叫座力嘅球星，重返球隊後即吸引球迷返回球場，並且入選二月嘅明星賽，但佢因為女兒患病而缺席。艾佛遜喺明星賽後曾短暫重返球隊，但表示女兒病情唔穩定，佢自上個月二十一日後，就再冇為球隊披甲。
艾佛遜早前曾表示深愛家人，故必須作出取捨。76人總經理史堤芬斯基表示：「艾佛遜餘下賽季都唔會重返76人，佢唔想因為自己嘅私事而影響其他隊友，因此我哋最終作出呢個決定。」