政情：「坪洲人」勁寸林偉強
離島區議會主席兼坪洲鄉事委員會主席林偉強，涉侵吞近十萬元區議會津貼醜聞愈鬧愈大，喺社交網站facebook都搞到㷫合合。用戶「坪洲人」喺facebook開設群組，聲言「我都唔知林偉強喺坪洲開過議員辦事處」，話一年只係見到林偉強幾次，更有用戶加入，話林偉強入親坪洲都係食飯，冇接見市民喎！「坪洲人」就好幽默回應話：「可能佢當係（食飯當接見市民）啦！」
不過，離島區議會秘書處早前向本報確認林偉強有喺坪洲開過議員辦事處，除非當事人低調到冇人睇到啦！呢個「坪洲人」都好均真，一併質疑其他坪洲鄉事委員，話佢哋部分人做咗咁多年委員，帳目咁亂無理由視而不見，但依家講到咁多數唔清唔楚，難道咁就可以置身事外？「坪洲人」建議班委員攞晒啲財政報告及會議紀錄等文件出嚟面對公眾，還街坊一個知情權。