荷里活經典科幻電影《回到未來》上映三十周年，掀起一陣懷舊熱潮，其實，對於唔少香港人嚟講，「回到未來」早就唔係新聞，家陣經濟低迷，民生凋敝，生活水平不斷倒退，想唔懷舊都幾難。
唔係誇張（口架），日前中文大學發表嘅研究報告顯示，香港生活質素指數十三年來零進步，幾乎差過沙士時期咁滯。香港假假哋都叫做國際都會，港府更加肥到着唔到襪，常年庫房水浸，點解好多人生活質素冇改善不特止，反而倒退呢？不如聽吓市民點講喇。「東方報業民意調查」顯示，大部分受訪者認為樓價及租金長升長有，不斷推高物價，而打工仔收入又追唔上通脹，成為拖累生活質素嘅主要原因。
冇錯嘞，喺地價高、樓價高、租金高嘅「三高」之下，無殼蝸牛固然望樓興嘆，就算買咗樓亦唔好得幾多，隨時要做一世樓奴，變相為地產商同埋銀行打工。有人計過數，一個中等收入嘅家庭，唔飲唔食唔消費，十五年至可以買到一個九龍區嘅三百幾呎豆腐膶單位，真係令人難以置信。
其實，小市民嘅要求好卑微嘅咋，但求有瓦遮頭就心滿意足，輪候公屋望到頸都長，惟有退而求其次，劏房、籠屋成為搶手貨，甚至連豬欄、雞場改建嘅居所都唔放過，你話生活質素點可能唔倒退呢？
正所謂，冤有頭，債有主。房屋問題積重難返，唔少受訪者認為係前朝政府埋下嘅禍根，真係冇講錯（口架）。前特首曾蔭權爵士無所事事，停建居屋，停止賣地，扭曲房屋政策，導致供求嚴重失衡，咪就係所有問題嘅根源囉。
當然喇，今日香港問題多多，除咗安居樂業難過登天，經濟發展停滯不前，亦係導致生活質素不進反退嘅原因之一。大家有眼見，隨着營商環境愈來愈困難，莫講話小商戶紛紛結業，國際連鎖名店一樣捱唔住，紛紛撤出，搞到購物旺區不少吉舖求租。有人預計，過咗農曆新年可能出現新一輪倒閉潮，唔係危言聳聽（口架）。
講到底，香港之所以搞成咁，皆因港府無能。港產官僚講就天下無敵，做就有心無力，咁多年來一事無成，經濟進入死胡同，金融業唔知仲頂得幾耐，開拓新型產業又毫無寸進，加上旅遊及零售業面臨寒冬，競爭力不斷下滑，前景愈來愈暗淡，小市民又點會有好日子過吖。
所以話，香港回歸十八年，好似返去幾十年前咁，簡直可悲。更慘嘅係，社會愈來愈政治化，爭拗無日無之，連大學校園都淪為鬥獸場，令人不勝其煩。再咁落去，香港遲早玩死自己，生活質素點止差過十三年前咁簡單！