潮流興環保，港府亦唔例外，近年推出唔少環保措施，係威係勢，可惜吖，港產官僚志大才疏，搞來搞去得個吉，咁多年來環境冇改善不特止，反而經常添煩添亂。好似推廣電動車咁吖，由於政策混亂，引起唔少爭議。
係咁嘅，港府以改善空氣質素為名，一九九四年起豁免電動車首次登記稅，政策本來無可厚非，弊在近年電動車愈來愈高級，售價愈來愈貴，獲豁免嘅稅額亦水漲船高，結果唔止造成不公，而且被質疑劫貧濟富添。
環境局回覆立法會嘅文件顯示，過去六個財政年度，獲豁免繳付首次登記稅嘅電動車有一千七百六十三架，豁免稅額達九十五億元；單計二○一四至一五年度，獲豁免首次登記稅嘅電動車就超過一千三百架，涉及豁免稅額近八十二億元，分別比對上年度激增十一倍及七十四倍。高官對呢啲數字沾沾自喜，話增幅令人鼓舞喎。
冇錯，電動車日漸普遍，對改善空氣質素無疑係一件好事，之不過，當局一刀切豁免所有型號電動車嘅首次登記稅，咁就值得商榷喇。係人都知，電動車型號五花八門，愈來愈高級，有啲電動車直情可以媲美高性能跑車添，如果購買相同匹數嘅柴油車，連同首次登記稅隨時要超過一百萬元，唔怪得愈來愈多人選購電動車，響應環保仲係其次，唔使繳付登記稅至係最大嘅誘因。
正如立法會議員質疑，大部分購買電動車嘅申請者選擇六十萬至一百萬元嘅高價型號，由此推算港府過去一年少收六億一千萬元稅款，變相以公帑資助富人購買電動跑車，你話合唔合理吖？
面對議員嘅質疑，環境局一味顧左右而言他，聲稱唔應該為有關稅項設限，因為咁會窒礙推廣使用電動車咁話。其實，從來冇人反對推廣電動車，只係認為唔應該由公帑資助富人啫，當局唔肯檢討相關政策，淨係識得耍官腔，簡直九唔搭八。
正所謂，有利必有弊，電動車係就係可以減少路面廢氣，但唔係完全冇缺點，淨係充電問題已經令人頭痛。港府搞到依家，充電站仲係嚴重缺乏，加上充電需要耗費大量電力，唔可以容許多架電動車同時充電，車主大感不便。再講吖，香港主要依靠燃煤及天然氣發電，電動車耗用電力，即係要增加發電，碳排放隨時不減反增o架。
講到尾，推動環保冇人話唔啱，最緊要合情合理。當局與其為富人錦上添花，不如花多啲資源做好其他環保工作，淨係廚餘回收就有好多地方要改善，當局講多過做，堆填區唔逼爆至奇吖。