政情：兩會開幕立會爆流會虛驚
全國政協尋日下晝揭幕，全國人大會議就會喺明日開始，立法會一共有十四個全國人大代表同政協委員，如果走晒就有流會嘅危險。尋日朝早十一點，立法會開大會時的確一度唔夠法定人數嘅三十人，要秘書處響鐘召集議員，有份救場嘅包括專登遲啲嘅劉健儀同何鍾泰等。
尋日十一點，議事廳疏疏落落，差幾個至夠三十人，秘書處響鐘一分鐘多啲，李慧琼、陳克勤、黃定光、王國興等已經魚貫衝入議事堂，何鍾泰同劉健儀亦喺人潮之中，咁多議員一齊現身，流會危機立即解除咗。
按照兩會慣例，全國人大代表都會列席政協開幕日，何鍾泰同劉健儀身兼港區人大，按慣例早已上咗京，今次卻缺席列席政協，好明顯係留港撐場啦。不過，尋日立法會氣氛都相對淡靜，泛民五員辭職加上唔少議員上咗京，結果會議較平時早咗結束。總之喺未來兩星期，大家都要小心，隨時準備補位楔牆喇。