手機上網陷阱重重，消委會都提醒過市民要小心，點知連出名數口精嘅盛智文都中過招，真係老貓燒鬚！盛智文尋日着咗成套唐裝衫宣傳海洋公園新春節目。
不過今年農曆新年佢就會喺泰國布吉島度過，主持佢喺當地一個商場開幕。
扮嘢文日理萬機，平時隨身攜帶三部電話，iPhone用嚟上網、Blackberry查電郵、以及一個接電話嘅手機。
佢話去年有一次到泰國，用手機透過免費Wi-Fi上網，唔知係咪手機接收唔到Wi-Fi訊號時，自動轉咗做GPRS收費模式收取數據，佢懵然不知，返港後收到張單，喺泰國短短六日，上網費竟然要一萬九千蚊，真係嚇咗一跳！
扮嘢文當然據理力爭啦，佢同電訊商理論，講明有啲上網費用並唔關佢事。雙方最後都達成和解，但扮嘢文亦畀咗部分費用，惟有當係買咗個教訓啦！
佢話經此一役，出埠時都唔敢亂咁開着部iPhone咯。