政情:李業廣暗寸發叔?

行政會議成員劉皇發涉嫌漏報利益一事搞到滿城風雨,另一行會成員李業廣尋日出席公開場合就話,做申報要好小心,就算佢有秘書專責幫佢處理申報嘅文件,佢每次都會金睛火眼望一次,實行做最後把關,確保報齊所有利益至簽名。唔通李業廣暗批發叔冇睇齊資料就亂簽名?李業廣就冇表態,不過就話佢自己嘅申報好易處理,因為最近已經唔係好積極投資,所以申報都冇乜改動喎!

唔投資,咁有乜細藝先?身為香港藝術節協會有限公司主席嘅李業廣就力銷藝術節嘅節目,仲身體力行支持添!藝術節今日開始接受優先訂飛,李業廣就自爆,同屋企人一齊訂好多個節目嘅票,足足寫滿三張訂票表格。唔講唔知,李業廣一家對藝術嘅偏好都唔同,佢自己就鍾意睇歌劇同芭蕾舞,太太就偏愛話劇同粵劇,而囝囝鍾意聽流行音樂,所以凡係Rock同Jazz嘅表演項目都唔會錯過,結咗婚又有小朋友嘅囡囡就要買合家歡劇目。嘩,就咁數都成十項,唔怪得李業廣搞訂飛搞到頭痛啦。不過藝術就係要多元化,咁證明藝術節真係照顧到唔同人嘅需要囉!

Money18新功能「18好路數」為你預測心水股票升跌機會率