傑仔本純良 僱主允出獄再聘用
【本報訊】錯手弒父的被告梁嘉傑，在長輩眼中是一名孝順乖仔。他上月認罪和昨日判刑時，他的契媽「淦姨」都有到庭。至於被告的僱主、工友，都對他讚不絕口，並經常往收押所探望他。另外，從沒到庭的被告母親，原來亦因為擔心兒子而長期靠安眠藥入睡。
被告契媽淦姨指被告自小缺乏關愛，形成怕陌生人和有輕微自閉的性格：「傑仔好少出聲，佢份人又純良又抵得諗，好肯幫人唔怕蝕底，我哋個個都好錫佢。」昨早她更特地為傑仔拜觀音，才偕同傑仔的堂兄阿順及兩名朋友到庭，抵達後仍合十祈福：「千祈唔好重判呀，一定要大步檻過……我真係好擔心……」並不時飲泣拭淚，直到判決後才放下心頭大石：「計埋假期，坐多年半左右就出得喇。」
被告兩名前同事形容傑仔外形魁梧，樣子兇惡，但相處後便覺他純品。其中一名前同事的父親鄭伯說，他兒子有輕度智障，但傑仔不嫌棄與他做朋友：「佢份人有禮貌，又乖又純品，我唔信佢會殺人，可能只係一時錯手。」
母愧對兒子 長期失眠
「佢身世好可憐所以比較自卑，但為人好勤力好有愛心，連流浪小貓小狗佢都照顧，點會殺人？」聘傑仔搬運石油氣的陳元武這樣形容傑仔。每逢時節陳都會邀傑仔回家吃飯，讓他感受家庭溫暖。傑仔還押期間，亦寫了十多封信問候他，令他十分感動：「佢好關心我，又問候我三個女，我當佢親人，依家判咁重，我個心都好唔舒服。」他承諾待傑仔出獄會重新聘請他。
傑仔犯案時與父同住，他的生母兩次均無到庭。不過傑母的好友透露，傑母與傑父離異後，已再婚並育有子女，故不方便到法庭：「其實佢媽媽都好慘，佢背負住好多不愉快嘅過去，依家又有自己家庭，佢根本唔識點面對個仔，又怕畀人知、畀人笑。」傑母的好友又指，傑母曾去過收押所探他，卻被傑仔拒見。
她又透露，年近六十歲的傑母現時在麻雀館任職，平日很少向朋友談起家事，「佢好保護自己，心事都收埋，今次佢同我講話佢好煩，差人同社工不停搵佢，佢為咗呢件事長期失眠，要靠安眠藥先瞓到。」