政情：王桂壎獲封律師廚神
律師會社區關係委員會尋日搞咗個「律師廚神大賽」，一共有九隊隊伍參加。咪睇律師平時斯斯文文，其實煮嘢食一樣有板有眼，好似中聯辦法律部代表咁，佢哋特登將一道由魚柳做嘅菜式命名為「一鍋兩制」，試食嘅評判聽到都會心微笑，最後攞到季軍。
除咗廚神大賽，尋日仲安排咗一個會長盃比賽，邀請另外四個專業團體代表，加埋律師會會長王桂壎代表嘅律師會，五隊人齊齊煮嘢食。今次賽制幾特別，五隊人喺比賽前一刻先知道用咩材料，王桂壎夫妻檔上陣，點知唔好彩抽中雪藏虎蝦，需知雪藏蝦味道一定次一皮，睇嚟落敗機會好高。
不過世事往往就係咁奇妙。王桂壎以前喺英國讀書時原來經常煮嘢食，佢一見到係雪藏蝦，即刻知道要煮到好濃味先過到關，於是用蒜頭、薑、葱、指天椒同胡椒粉去調味，之後用生油煎到八成熟，再用牛油煎埋餘下兩成，等啲蝦乾晒身先上碟。王會長仲話，最後一定要加入大量清酒，咁先可以蓋過啲雪藏味。比賽結果係點，唔使講梗係王會長攞冠軍啦，連評判之一嘅行會召集人梁振英都話冇得頂，食過翻尋味喎！